کیک پر طلاق مبارک لکھوا لیا۔۔ عورت طلاق کے بعد لوگوں میں سونا کیوں بانٹنے لگی؟ ویڈیو وائرل

"میں اس خوشی کے موقع کو منانا چاہتی تھی اور پارٹی کی میزبانی کرنے اور سونے کے انعامات دینے سے بہتر اور کیا طریقہ ہے؟ میں اس خوشی کے موقع کو سب کے ساتھ بانٹنا چاہتی تھی اور مجھے یہی طریقہ سمجھ آیا کہ لوگوں کو کھانا کھلاؤں اور قیمتی تحائف دوں“

یہ کہنا مصر کے شہر قاہرہ کی ایسی خاتون کا ہے جنھوں نے طلاق لینے کے بعد اس موقع کو بھرپور انداز میں منایا اور پارٹی دی۔ اس پارٹی میں انھوں نے چاکلیٹ کیک بھی منگوایا جس پر طلاق مبارک جیسے الفاظ دیکھ کر لوگ حیران رہ گئے۔

اگرچہ خاتون کا نام میڈیا میں نہیں دیا گیا لیکن ویڈیو میں انھیں بات کرتے ہوئے دیکھا جاسکتا ہے۔ خاتون کا کہنا ہے کہ انھیں طلاق پر کوئی افسوس نہیں ہے جس کی وجہ ان کے سابق شوہر کی بے وفائی ہے جو وہ سہہ نہیں سکتی تھیں اور اس مسئلے کا واحد حل طلاق تھا۔

واضح رہے کہ مصر سمیت دنیا بھر میں پہلے کے مقابلے میں طلاق کی شرح بڑھتی پائی گئی ہے۔ سنٹرل ایجنسی فار پبلک موبلائزیشن اینڈ سٹیٹسٹکس کی ایک رپورٹ کے مطابق مصر میں 2021 میں طلاقوں کی تعداد تقریباً 245,000 تھی جو کہ پچھلے سال کے مقابلے میں 13 فیصد زیادہ ہے۔